Hainbat herritarrek azkenaldian Euskal Herrian bizi den errepresioa gogortu dela salatu dute, eta horren adibide jo dituzte azken asteetako atxiloketa, tortura salaketak eta espetxeratzeak, Berriozarko kontzertuko istiluak, Udalbiltzaren aurkako epaiketa zein hainbat udaletan EAE-ANVren taldeak desegin izana.

Adibide guzti hauen lekukoak izan dira, hain zuzen ere, larunbateko manifestaldia antolatu dutenak: espetxeratuek senideak, Udalbiltzako auziperatuak, Berriozarko kontzertuko zaurituak… Mobiizazioaren leloa «Salbuespen egoerari stop. Demokrazia Nafarroa eta Euskal Herriarentzat»izango da.

Herritar hauen ustez adibide hauek «argi eta garbi erakusten dute UPNk eta PSNk Ezker Abertzalea deuseztatzeko duten apustua», eta apustu horren helburua Ezker Abertzaleak bere autonomia proposamena landu ezin izatea dela argudiatu dute.

Norabide horretan PSOEren estrategia salatu dute bereziki, GALen garaian erabilitako metodoak baliatu izana leporatu baitiote. Horren erakusletzat jo dute Alberto Lopezen «bahiketa», hura atxilotzeko guardia zibilak kotxez haren kontra talka egin zuela gogoratu dute, baita senide zein abokatuei jakinarazi gabe atxilotu eta bost egunez inkomunikatuta izan zutela. Horrekin batera, erakunde publikoen isiltasuna salatu dute.

Honen guztiarengatik, egoera honi amaiera eskatzeko manifeslatian parte hartzeko deia zabadu diete herritar guztiei.