Burlatako jaiak hastear direla, preso gaixoen eta zigorra beteta dutenen askatasuna aldarrikatu dute Iruñerriko hainbat preso politikoen senideek eskainitako prentsaurrean. Norabide horretan, larunbatean Burlatan antolatu duten manifestaldian parte hartzeko gonbitea luzatu dute.

Peio Santxez, Mikel Gil, Marilo Gorostiaga eta Carlos Perez presoen senideak izan dira prentsaurrean, lehenengo hirurak gaixotasun larri eta sendaezinak dituztenak eta laugarrena Parot doktrina bezala ezaguna den ebazpena jarri diotena. Bildutakoen aldarria preso hauen eta, orokorrean larriki gaixorik dauden eta zigorra bete duten euskal preso guztien askatasuna izan da, eta Iruñerriko herritar guztiei aldarrikapen honekin bat egiteko eskakizuna egin dute ere.

Izan ere, beraien ustetan «mendekuan eta gorrotoan oinarritutakoa da Estatu espainol eta frantsesaren espetxe politika», eta euskal presoen eskubide norbanako eta kolektiboak «sistematikoki urratuak» direla azaldu dute. Horren erakusle bildutakoen senide presoen kasuak gogora ekarri dituzte, baita Hodei Ijurko, Josetxo Arizkuren edo Eneko Olza Iruñerriko presoen kasuak ere.

Dena dela, euskal presoen eskubide urraketa kasuak «amaigabeak» direla adierazi dute, eta horregatik egoerarekin «lehen bait lehen amaitzea beharrezkoa» dela azaldu dute. Hauen arabera, egoera hau ez da bakarrik presoen eta beraien senideen arazoa, «jendarte osoaren arazoa baizik». Hori dela eta, jendarte osoari deialdia luzatu diote larunbatean Burlatako txosna gunetik 20.00etan abiatuko den manifestaldian parte hartzeko.