UPN, CDN eta PSN alderdiek azken atxilotuen senideei parlamentuan hitza ematearen aurka agertu dira. Amnistiaren Aldeko Mugimenduaren ustez, «urte honen hasieran argi gelditu zen zein den parlamentuaren jarrera torturaren aurrean. Igor Portu eta Mattin Sarasola nafarrek jasandako tortura basatien aurrean parlamentuak babes osoa eskaini baitzien estatuko segurtasun indarrei». Kasu honetan azken atxilotuen senideei ukatu diete hitza UPN, CDN eta PSN alderdiek. Modu honetan azken atxilotuen tortura testigantzak isildu dituzte, nafar gizarteari senideen bertsioa ezkutatuz.
Bestalde, talde honen esanetan, «parlamentua ez da nafarroako erakunde bakarra izan azken tortura testigantzen aurrean jarrera hau hartu duena. Besteak beste Iruñako udala ukatu egin zen NBE eta Amnistia Internacional erakundeen gomendioak barnebiltzen zituen mozio bat eztabaidatzera, eta Nafarroako arartekoak ez zituen hartu nahi izan azken atxilotuen senideak inkomunikazio aldian».
Azkenik, Amnistiaren Aldeko Mugimenduak, modu honetako testigantzei ateak itxi eta torturaren eztabaida ekiditen duten politikariek arazo serio bat dutela demokraziaren kontzeptuarekin salatu dute eta «jarrera hauek guztiek bidea irekitzen dietela etorkizuneko tortura kasuei esan dute».