Hauxe da Udako Euskal Unibertsitateak antolatzen dituen udako ikastaroen 26. edizioa, eta Eibarren eta Baionan aritu ostean Iruñean izango dira gaurtik hasita ostiralerarte. Izan ere Iruñean emango diote bukaera udako saioari, eta hura ospatzeko Leihotikan taldearen kontzertua izango da Zaldi Zurian.

Aurtengo udako ikastaroak Udako Menua izenpean antolatu dituzte, eta ekainaren 30ean hasi ziren Eibarren. Bertan bi astez luzatu ostean Baionan beste hainbeste heziketa saio izan dira, eta Udako Menuari amaiera emateko Iruñeara heldu dira aste honetan. Konpainia kaleko Hizkuntz Eskola Ofizialaren egoitzan izango dira ikastaroak, eta besteak beste euskararen botere ekonomikoa, inmigrazioa, Wikiak eta sexologia izango dira jorratuko dituzten gaiak.

Udako ikastaroei amaiera emateko jaia ere antolatu dute, eta hala, ostegun honetan Leihotikan talde iruindarraren kontzertua izango da Zaldi Zurian 20.00etan.

UEU-ri dagokionez 1972. urtean jaiotako antolakundea da, Euskaldunen Biltzarra, Ikas eta Fededunak elkarteen ekimenez. Euskal unibertsitatea sortzea helburu, udako ikastaroak antolatzen hasi ziren, eta 1985. urtetik aurrera urtean zehar hainbat jardunaldi antolatzeari ekin zioten. Bestalde, UEU-k unibertsitate mailako zein dibulgazio liburu ugari argitaratu ditu bere ibilbide luzean.

IKASTAROEN ZERRENDA:

- Euskara-Ekonomia: Euskararen botere ekonomikoa. Euskara salgai?
- Immigrazioa: Immigrazioa eta kulturartekotasuna
- Informatika: Wikiak eta elkarlanerako tresnak
- Kazetaritza: Zergatik ez soinu-bitakora?
- Ondarea: Kultur ondarearen azterketa teoriko-praktikoa
- Pedagogia: Irakaskuntza-metodo alternatiboak: irakaskuntza libertarioa
- Pedagogia-Ipuin-kontalaritza: Kontu-kontari tailerra
- Psikologia: Bitartekaritza familiarraren hastapenak
- Sexologia: Sexuen esanahiak eta esan nahiak
- Talaiatik: Harreman harmonikoa izateko komunikazio-trebetasunak
- Yoga: 14 izpi.ariketa herri-estresari aurre egiteko

Informazio gehiago: ikastaroak.ueu.org