Urriaren 6tik 17ra zabalik dago Euskaldunon Biltokin Esklabotza Frankismoan: errepideak eta fortifikazioak Mendebaldeko Pirinioan erakusketa,  Memoriaren Bideak eta Geronimo de Ustariz institutuak antolatua.
Kontzentrazio Eremuen Zuzendaritzaren menpe erregimen frankistak hartutako prisioneroek egin behar izan zituzten bortxazko lanen sarea oso zabala izan zen: fabrikak, errepideak, meategiak, burdinbideak, lan hidraulikoak… Erakusketa honek Pirinioko mugan errepideak egin zituzten Langileen Batailoiak ditu aztergai. Edurne Beaumont eta Fernando Mendiola historialarien ikerketa lanaren emaitza da, eta asteazken arratsaldean emandako hitzaldian azaldu zizkiguten ikerketaren zehaztapenak
Beraien azalpenaz gain, egoera honek prisioneroengan, beraien familiengan eta inguruko biztanleengan izandako eragina ikusteko aukera izan genuen Eguzki Bideoak-ek egindako dokumental hunkigarrian, beraien testigantzen bidez.
Hizlariek azpimarratu zutenez, beste estatu batzuetan, Alemanian kasu, faxismoa kondenatu eta kontzentrazio eremuen biktimei kalte-ordaina eman zaie; Espainiar Estatuan, berriz, isilean gorde da errealitate hau, eta gizarte ekimenaren bidez soilik ematen ari da aditzera. Hori da hain zuzen erakusketaren zein dokumentalaren helburua, eta, horretaz gainera, bortxazko lanetara zigortutako pertsonei izan ez duten errekonozimendua ematea.
Aipatu behar da hainbat ikastetxetako ilasleak pasatzen ari direla erakusketa ikustera. Dokumentalaren bukaeran Zaraitzun egondako prisionero baten semeak dioen bezala, oso garrantzitsua da belaunaldi berriek gure historia hurbilean gertatutako bidegabekeria hauek ezagutzea.