Fertxu Izquierdo idazleak bere azken lana den Mendeko Borroka (Assalto a Roma) aurkeztuko du bihar, arratsaldeko 20.30tan, Txantreako Auzotegi Elkartean.  Aurreko urtean bere lehen poesia liburua argitaratu ondoren, Izquierdok eleberria idazteko beka eskuratu zuen, eta horren ondorio da orain kaleratzen duen lana. Eleberri hau Erroman idatzi  du Izquierdok eta orain bere betiko auzora bueltatuko da lana aurkezteko. Liburua 70eko hamarkadako Erroman kokaturik dago eta bere orrialdetan zehar Faximoaren kontrako borroka, maitasun istorioak eta  umorea aurkitu ahal izango ditu irakurleak.

 Eleberriaren nondik norakoak

Bruce Lee eta Nora Miao Erromara iritsi dira film bat errodatzeko asmoz
eta 70eko hamarkadako hiri nahasi bat topatuko dute: Giovanni,
partisano zaharra, bere oroitzapenetan murgildurik bizitzeaz gain, Moby
Dick liburuarekin obsesionaturik dago eta Settimoren tabernan ematen
ditu egunak, balea zuria noiz harrapatuko zain. Marco Giorno famoso
aldizkariko kazetaria da, egunez Loloren liburu-denda bisitatzen duena,
gauez beste saltsa batzuetan sarturik ibiltzen bada ere.
Chuck Norris Erromara iritsi den une berean, Avanguardia Nazionale
talde faxista hiriko estoldetan ari da lanean ezezagun misteriotsu
baten agindupean.
Fabio eta Nina Lotta Operaia partisano berrien erresistentzia antolatu
nahian dabiltza, Carla Capponi, PCIko parlamentaria, hiria jo duten
atentatuak direla-eta kezkaturik dabilen bitartean.
Anita Ekberg eta Marcello Mastroianni Fontana di Trevin errodatutako
fotograma sail bat baino zerbait gehiago dira.
Mende bateko borrokak biltzen dira hiri eternalean. Bi gladiadore modernoen
borroka XX. mendeko harearen gainean. Filmazio bat eszenatoki zail
samar batean. Erroma molotov koktel bat da, edozein unetan lehertu daitekeena.